Қорғаныс министрлігі Сарыөзек гарнизонындағы жауынгер қазасының себептерін атады

24 Мая 2016 1760

Алматы. 24 мамыр. Ақпараттар орталығы. Сарыөзек гарнизонының әскери бөліміндегі жауынгер қазасының басты себептерінің бірі әскери қызмет өткеру барысында қауіпсіздік шараларын қамтамасыз ету жөніндегі талаптардың еленбеуі, деп санайды ҚР қорғаныс министрі Иманғали Тасмағамбетов.

Алматы облысындағы Сарыөзек гарнизонын тексерді. Тексеріс кезінде оқу-жауынгерлік даярлық, әскери бөлімдердің жазғы оқыту кезеңіне әзірлігі мәселелері қаралды. Сондай-ақ мерзімді қызметтегі әскери қызметшінің қаза болу дерегі егжей-тегжейлі талқыланды, деп хабарлады қорғаныс ведомствосының баспасөз қызметінен.

Оқиғаның себептері жоғарыда аталған бөлім лауазымды адамдарының әскери қызмет өткеру барысында қауіпсіздік шараларын қамтамасыз ету жөніндегі талаптарды елемеуі салдарынан болды.

«Әдетте, әскерлерде орын алатын қайғылы оқиғаларда қауіпсіздік шараларының бұзылуы, бақылаудың болмауы және лауазымды адамның немқұрайлығы себепкер болады», – деді И. Тасмағамбетов.

Ол «Аталған факті бойынша қылмыстық іс қозғалғаны өте дұрыс және барлық кінәлі адамдар лайықты жазаларын алуы тиіс» деп санайды».

Хабарда айтылғандай, тексеріс аяқталғаннан кейін кадрлық және тәртіптік шешімдер қабылданады.

Баспасөз қызметінде еске салғандай, 21 мамыр күні 12740 әскери бөлімінде парк-шаруашылық күні өткізілген болатын. Оның аясында бөлім, ұрыс машиналары паркінің аумағында, бөлімшелердің ішінде жұмыстар ұйымдастырылды. Ғимаратты бөлшектеу бойынша жұмыстарды орындау кезінде құрылыстың бөлігі опырылып түседі. Соның салдарынан құрылыс элементтерінің бірі сол маңайда тұрған 12740 әскери бөлімінің мерзімді қызметтегі қатардағы жауынгері Е. Жақашевтің үстіне құлайды. Нәтижесінде қатты жарақаттан әскери қызметші Сарыөзек кентінің лазаретінде көз жұмады.